20ኛውን የኢትዮጵያ ብሔሮች ብሔረሰቦችና ህዝቦች ቀን ምክንያት በማድረግ በተማሪዎች መካከል የፍጻሜ የጥያቄና መልስ ውድድር ተካሄደ።
የጥያቄና መልስ ውድድሩ ከትምህርት ቤት ጀምሮ በተካሄደ ውድድር አሸናፊ ሆነው ለፍጻሜ በቀረቡ 5 የአማርኛ እና 5 የአፈን ኦሮሞ ስርአተ ትምህርት ተማሪዎች መካከል የተካሄደ ሲሆን በመርሀግብሩ የከተማ አስተዳደሩ ከፍተኛ አመራሮችን ጨምሮ የትምህርት ዘመራሮች ፣ ርዕሳነ መምህራን ፣ መምህራን እንዲሁም ወላጆችና ተማሪዎች ታዳሚ ሆነዋል።
የአዲስ አበባ ከተማ ምክር ቤት ምክትል አፈጉባኤ እና የመርሀግብሩ የክብር እንግዳ ክብርት ፋይዛ መሀመድ 20ኛው የኢትዮጵያ ብሔሮች ብሔረሰቦችና ህዝቦች ቀን "ዲሞክራሲያዊ መግባባት ለህብረ ብሔራዊ አንድነት"በሚል መሪ ቃል በከተማ ደረጃ በተለያዩ መርሀግብሮች በድምቀት በመከበር ላይ መሆኑን ጠቅሰው በአሉ ከትምህርት ቤት ጀምሮ የጥያቄና መልስ ውድድርን ጨምሮ በተለያዩ መርሀግብሮች መከበሩ ተማሪዎች የሉአላዊነታችን መገለጫ ከሆነው ህገመንግስት ጋር በተገናኘ በቂ ዕውቀት እንዲኖራቸው የሚያግዝ መሆኑን በመግለጽ በአሉ ከትምህርት ቤት ጀምሮ በስኬት እንዲጠናቀቅ አስተዋጽኦ ላበረከቱ አካላት ምስጋና አቅርበዋል።
የአዲስ አበባ ከተማ አስተዳደር ትምህርት ቢሮ ኃላፊ ዶክተር ዘላለም ሙላቱ በበኩላቸው 20ኛው የኢትዮጵያ ብሔሮች ብሔረሰቦችና ህዝቦች ቀን የሀገራችን ኢትዮጵያ የማንሰራራት ምልክት የሆነው የህዳሴ ግድብ ግንባታ በተጠናቀቀበት ማግስት መከበሩ ለየት እንደሚያደርገው ጠቁመው በአሉ ከትምህርት ቤት ጀምሮ በተለያዩ መርሀግብሮች በድምቀት ሲከበር መቆየቱን አስታውቀዋል።
ኃላፊው አያይዘውም 20ኛውን የኢትዮጵያ ብሔሮች ብሔረሰቦችና ህዝቦች ቀን ምክንያት በማድረግ ከትምህርት ቤት ጀምሮ የተካሄደው የጥያቄና መልስ ውድድር ተማሪዎች ከህገመንግስት እና ከፌደራል ስርአቱ ጋር በተገናኘ ያላቸውን ግንዛቤ እንዲያሳድጉ የሚያበረክተው አስተዋጽኦ ከፍተኛ መሆኑን ገልጸው ቢሮው በጥያቄና መልስ ውድድሩ አሸናፊ ለሆኑ ተማሪዎች ዕውቅና የሚሰጥ መሆኑን አስገንዝበዋል።
በከተማ አቀፉ የፍጻሜ የጥያቄና መልስ ውድድር በአማርኛው ስርአተ ትምህርት 1ኛ ተማሪ ሳራ አህመዲን 2ኛ ተማሪ ህሊና ጌታሁን 3ኛ ተማሪ ተመስጌን ተስፋዬ እንዲሁም ተማሪ ብሌን ጥላሁን እና ተማሪ ፋንታዬ እሸቱ በእኩል ነጥብ 4ኛ በመሆን ያጠናቀቁ ሲሆን ከአፋን ኦሮሞ ስርአተ ትምህርት 1ኛ ተማሪ ፍራኦል ፍቃዱ 2ኛ ተማሪ ሰሚራ ንጋቱ 3ኛ ዳንኤል ኢና እንዲሁም ተማሪ ጫልቱ ቶሊና እና ተማሪ ናናቲ ምስጋና 4ኛ በመሆን አጋዥ መጽሐፍ እና ታብሌት ስልክ ተበርክቶላቸዋል።
.