የዓለም ህፃናት ቀን በጎፋ ቅድመ አንደኛ ደረጃ ትምህርት ቤት ተከበረ::

---

የአዲስ አበባ ከተማ አስተዳደር ትምህርት ቢሮ ቀዳማይ ልጅነት ጉዳዮች ትግበራ ዳይሬክቶሬት "የህፃናት ጥበቃና የመጫወት መብት ለሁሉም ሕፃናት!" በሚል መሪ ቃል በዓለም አቀፍ ደረጃ ለ36ኛ በሀገራችን ለ20ኛ ጊዜ የሚከበረውን የህፃናት ቀን በጎፋ ቅድመ አንደኛ ደረጃ ትምህርት ቤት በመገኘት አክብሯል::

የዘርፈብዙ ጉዳዮች ትግበራ ቡድን መሪ አቶ ይልማ ተሾመ በዓሉ ሲከበር ባስተላለፉት መልእክት ሕፃናት በጨዋታ ውስጥ አካላዊ ፣ አእምሮአዊ ፣ ማህበራዊ እና ስሜታዊ እድገታቸውን የሚያጎለብቱበት ጊዜ በመሆኑ ለጤናማ እድገት ወሳኝ  መሆኑን አብራርተው ትምህርት ቤቶችና የመኖሪያ አካባቢዎች ሕፃናት እንዲጫወቱ ምቹ ሁኔታ የሚፈጥሩ ሊሆኑ ይገባል ብለዋል:: አክለውም ህፃናት በየትኛውም ጉዳይ ሳይለዩ ሕፃናትን በማሳተፍ ፣ ለሕፃናት ጥቅም ቅድሚያ በመስጠት እንዲሁም አካላዊ እና ስሜታዊ ጉዳት እንዳይደርስባቸው ጥበቃ በማድረግ ማሳደግ አለብን ብለዋል::

ሕፃናት ማግኘት የሚገባቸውን መብት እያገኙ በስነምግባር እና በእውቀት ታንፀው እንዲያድጉ ትምህርት ቤቶች ኃላፊነት ያለባቸው መሆኑን የተናገሩት የትምህርት ቤቱ ርዕሰ መምህር አቶ እባበይ ዘመነ በበኩላቸው ሕፃናት በበቂ ሁኔታ በእድሜያቸው ተጫውተው እንዲያድጉ  ሁላችንም ኃላፊነታችንን ልንወጣ ይገባል  ብለዋል::

የወረዳ 5 ትምህርት ፅ/ቤት ኃላፊ አቶ ህንሰርሙ ለልጆች መብት መከበር ትምህርት ቤቶች ትልቅ የቤት ስራ መስራት አለባቸው ሲሉ ተናግረው የሕፃናትን መብት ለማስከበርና ሕፃናት በእድሜያቸው ተገቢ የሆነ ጨዋታ ተጫውተው እንዲያድጉ ሁሉም የድርሻውን እንዲወጣ አሳስበዋል::

በዓሉ ሲከበር ወላጆችና አሳዳጊዎች ፣ መምህራን ፣ መንግስታዊ አካላትና ማህበረሰቡ ሕፃናት ጤናማና ደስተኛ ሆነው በጨዋታ እንዲያድጉ የማድረግ ኃላፊነት እንዳለባቸው መልእክት የተላለፈ ሲሆን ፣ የዘርፈ ብዙ ጉዳዮች ዳይሬክቶሬት ባለሙያዎች ፣ የትምህርት ቤቱ ተማሪዎች ፣ ርዕሰ መምህራን ፣ መምህራንና የአስተዳደር ሰራተኞች በተገኙበት የዓለም ሕፃናት ቀን በድምቀት ተከብሯል::

.