የአዲስ አበባ ከተማ አስተዳደር ትምህርት ቢሮ በዓለም አቀፍ ለ114 ኛ በሀገራችን ለ 49ኛ ጊዜ የሚከበረው  ማርች 8 የሴቶች ቀን በእቴጌ መነን ልጃገረዶች 2 ኛ ደረጃ ትምህርት ቤት አክብሯል ::

የአዲስ አበባ ከተማ አስተዳደር ትምህርት ቢሮ ምክትል ቢሮ ኃላፊ አቶ ወንድሙ ዑመር በአሉ ሲከበር ተገኝተው ባስተላለፉት መልእክት በየዓመቱ የሚከበረው የሴቶች ቀን ሴቶች አይችሉም የሚል ጫናን በመጣል በማህበራዊ ፣  ኢኮኖሚያዊና ፖለቲካዊ ተሳትፎ ከወንዶች እኩል መቻላቸውን ለማሳየት የተከፈለ ትግል ውጤት የምናስብበት ነው በማለት አብራርተዋል ::

ሴቶች ምቹ ሁኔታና ዕድል ካገኙ የተሻለ ውጤት ማስመዝገብ እንደሚችሉ የተናገሩት ምክትል ቢሮ ኃላፊው የመነን ልጃገረዶች ትምህርት ቤት ተማሪዎች ለዚህ ማሳያ ይሆናሉ ብለዋል:: አክለውም በአሉን በዚህ ትምህርት ቤት ስናከብር  ቤተሰብና ሃገር ከናንተ ብዙ ውጤት እንደሚጠብቅ የቤት ሥራ ለመስጠት ነው ብለዋል ::

የትምህርት ቤቱ ርዕሰ መምህርት ወ/ሮ ሃና ፀጋዬ በበኩላቸው ለእቴጌ መነን የልጃገረዶች 2ኛ ደረጃ ትምህርት ቤት ተማሪዎች ሁልጊዜ የሴቶች ቀን ነው በማለት ተማሪዎቹን ያበረታቱ ሲሆን ሴቶች መቻላችሁን በተግባር ለማሳየት ውጤታማነት ላይ በትኩረት እንድትሰሩ በማለት አሳስበዋል::

በመርሃ ግብሩ ላይ በትምህርት ቤቱ ከ7ኛ እስከ 12ኛ ክፍል በአጠቃላይ ውጤት ከፍተኛ ነጥብ ላስመዘቡ ተማሪዎች ሽልማት ተበርክቶላቸዋል::